Дарагія Чытачы!
Мы распачалі духоўную падрыхтоўку да Вялікадня. Для хрысціян гэта найважнейшая ўрачыстасць ва ўсім літургічным годзе. Каб адчуць сапраўдную радасць велікоднага ранку, неабходна добра падрыхтавацца.
Мне моцна запала ў памяць параўнанне, пачутае калісьці. Ёсць прынцыповая розніца паміж успрыманнем чагосьці “знутры” і “звонку”. Калі я сяджу, зачыніўшыся ў пакоі, а ў суседнім памяшканні ідзе забава, гучыць музыка і смех, то ўсё гэта мяне раздражняе, перашкаджае і, як здаецца, цягнецца бясконца доўга. Калі ж я сам удзельнічаю ў забаве, час ідзе хутка і незаўважна, музыка ўзрушвае, смех падаецца натуральным і зразумелым.
Штосьці падобнае і з Вялікім постам. Мы ўспрымаем яго па-рознаму тады, калі гэта толькі нешта знешняе, “навязанае”, і тады, калі перажываем яго ўцягнута, як нешта ўласнае.
Правядзём жа гэты час добра, падрыхтуемся да сустрэчы з уваскрослым Панам!
