16 лістапада, калі ў Гродзенскай дыяцэзіі святкавалася ўрачыстасць яе Апякункі, Панны Марыі Вастрабрамскай, у Міждыяцэзіяльнай вышэйшай духоўнай семінарыі ў Гродне прайшоў дзень засяроджання.
Правёў духоўныя практыкаванні а. Сяргей Гусар OFMCap. У цэнтры яго разважанняў былі два аспекты святарскага служэння — крэатыўнасць і сталасць.
Разважаючы пра святарства, айцец Сяргей засяродзіўся на тым, як можна адкрываць і развіваць дары, атрыманыя ад Бога, і выкарыстоўваць іх у служэнні.
Рэкалекцыяніст адзначыў, што крэатыўнасць дапамагае шукаць спосабы найбольш поўна рэалізаваць сваё пакліканне, а сталасць — адказна і верна жыць ім, і што гэтыя якасці важныя не толькі ў святарскай дзейнасці, але і ў працэсе фармацыі, калі семінарыст вучыцца глыбей разумець сябе і свой шлях.

Адпраўным пунктам для разважання стаў апостальскі ліст Папы Францішка “Patris corde” (“Бацькоўскім сэрцам”), прысвечаны святому Юзафу. Спасылаючыся на гэты дакумент, святар заахвоціў семінарыстаў адказаць сабе на пытанні: “Чым Бог мяне адарыў?”, “Якое пакліканне майго паклікання?”, “Чым я адрозніваюся ад іншых?” На думку рэкалекцыяніста, гэтыя пытанні дапамагаюць убачыць асабістыя дары і непаўторнасць паклікання, не толькі разважаць, да чаго чалавек пакліканы, але і шукаць, якім чынам ён можа адказаць на Божы заклік менавіта са сваімі дарамі, здольнасцямі і асаблівасцямі, а ўсведамленне ўласнай непаўторнасці можа дапамагчы семінарысту лепш зразумець, дзе і як яго служэнне будзе найбольш плённым.
Таксама ў межах канферэнцый айцец Сяргей распавёў пра ўласны шлях да святарства. Семінарысты маглі задаць пытанні, размова была магчымасцю пачуць пра асабістае перажыванне паклікання з першых вуснаў. Падсумоўваючы разважанні, рэкалекцыяніст заахвоціў будучых святароў адкрыць, у якой галіне кожны з іх можа найлепш служыць і рэалізоўваць свае дары.
У семінарыі адзначаюць, што дзень засяроджання стаў для ўдзельнікаў магчымасцю задумацца, паразважаць над уласным пакліканнем і глыбей прыгледзецца да таго, як Бог вядзе кожнага з іх.
Прэс-служба Гродзенскай дыяцэзіі






