Skip to main content

У Сапоцкіне адзначылі з удзелам біскупа Аляксандра Кашкевіча ўрачыстасць у гонар Маці Міласэрнасці

photo 2026 11 17 09 59 4016 лістапада сапоцкінская парафія Унебаўзяцця Найсвяцейшай Панны Марыі i св. Язафата Кунцэвіча адзначыла адпустовую ўрачыстасць у гонар Панны Марыі Вастрабрамскай, Маці Міласэрнасці.

Абраз Панны Марыі Вастрабрамскай шмат гадоў знаходзіцца ў галоўным алтары парафіяльнага касцёла. У парафіі адзначаюць, што яе вернікі звяртаюцца да Маці Міласэрнасці ў штодзённых праблемах і ў справах парафіяльнай супольнасці.

Імшу цэлебраваў біскуп Аляксандр Кашкевіч. Звяртаючыся да прысутных, ён у пачатку літургіі нагадаў, што Маці Божая Вастрабрамская з’яўляецца Апякункай Гродзенскай дыяцэзіі з часу яе стварэння, і дадаў, што пад Яе чуйным вокам Касцёл на Гродзеншчыне можа ўзрастаць і развівацца.

У гаміліі прэс-сакратар Гродзенскай дыяцэзіі кс. канонік Юрый Марціновіч засяродзіў увагу на сімволіцы абраза Маці Божай Вастрабрамскай. Ён адзначыў, што гэты абраз красамоўны ў сваёй прастаце і што Панна Марыя “заўсёды гатовая заключыць у абдымкі кожнага, хто прыходзіць да Яе са сваёй бядой, цяжарам граху, хваробай, страхам за заўтрашні дзень”.

Святар сказаў, што да Маці Божай кожны можа прыйсці без усялякага страху, што Яна “ніколі не адмаўляе, не пытаецца, чаму мы ўпалі, а з чуласцю дапамагае ўстаць, выцірае нашы слёзы і вядзе нас наўпрост да свайго Сына – адзінай крыніцы сапраўднага міру і прабачэння”.

Урачыстасць завяршылася выстаўленнем Найсвяцейшага Сакрамэнту. Пробашч кс. Антоні Абухоўскі падзякаваў прысутным за ўдзел, а таксама за любоў, з якой, па яго словах, вернікі парафіі ўшаноўваюць Панну Марыю ў вастрабрамскім абразе.

Прэс-служба Гродзенскай дыяцэзіі