З 9 па 14 жніўня ў Навагрудку прайшлі летнія рэкалекцыі супольнасці Gloriosa Trinita.
Дні рэкалекцый сталі для супольнасці Gloriosa Trinita сапраўдным часам ласкі і цішыні, у якой гаворыць Сам Бог. Супрацоўніцтва ўдзельнікаў у Трынітарнай любові – Айца, Сына і Святога Духа – умацавала іх веру, падарыла глыбокі ўнутраны мір і запаліла сэрцы. Гістарычная навагрудская зямля, сцены старажытных касцёлаў, заступніцтва бласлаўлёных сясцёр – усё нагадвала пра вечнасць і рабіла Неба бліжэй.
Як адзначаюць удзельнікі рэкалекцый, Гасподзь заўсёды ведае, у чым маюць патрэбу Яго дзеці, і Яго промысл дасканалы. Ён умее здзівіць сваёй шчодрасцю!
Сапраўдным Божым падарункам і бласлаўленнем для членаў супольнасці Gloriosa Trinita стала нечаканая сустрэча з кс. Еўгеніем з Мінска і с. Наталляй Грыгарук. Іх прысутнасць стала бачным знакам Божай клапатлівасці.
“Асаблівая радасць і ўдзячнасць перапаўняюць нашы сэрцы за нашых святароў, якія дзяліліся гэтым часам з намі. Дзякуй нашаму пробашчу кс. Руслану Мазану, які, нягледзячы на ўсе свае душпастырскія клопаты, знайшоў час і быў адзін з дзён разам з супольнасцю, умацоўваючы нас сваёй прысутнасцю і падтрымкай. Дзякуй і нашаму маладому вікарыю кс. Максіму Ваўчку за яго адкрытасць, энергію веры і шчырае служэнне. Хочацца сказаць дзякуй, кожнаму ўдзельніку за супольную малітву, за ўсмешкі, за глыбокую цішыню адарацыі і за радасць быць адзіным цэлым у Хрысце. Праз кожнага з нас Сам Гасподзь напоўніў гэтыя рэкалекцыі асаблівай цеплынёй. Няхай агонь трынітарнага кахання, які мы запалілі ў Навагрудку, сагравае нашы сем’і і супольнасць. Гэтае святло будзем захоўваць у сваіх сэрцах!” – дзеляцца ўражаннямі ўдзельнікі рэкалекцый.
Лідзія Борыс
