"У гасцях у святой Ганны": у гродзенскай парафіі прайшоў Дзень сям'і

26 ліпеня ў гродзенскай парафіі Беззаганнага Зачацця Найсвяцейшай Панны Марыі прайшоў Дзень сям'і. Ён быў праведзены ў пяты раз.

Мэтай было падкрэсліць, што сямейнае жыццё - удзел у місіі Касцёла, таму яно з'яўляецца шляхам да святасці, і што кожнае чалавечае жыццё недатыкальнае з зачацця да натуральнай смерці, нагадаць пра абавязак аберагаць і паважаць кожнае чалавечае жыццё, дар мацярынства і сям'і.

Свята мела назву "У гасцях у святой Ганны", таму што ў гэты дзень у парафіі адзначалася адпустовая ўрачыстасць у гонар гэтай святой, маці Панны Марыі.

На свяце сабралося шмат сем'яў гэтай і іншых гродзенскіх парафій. Самай важнай падзеяй дня была Імша, якую цэлебраваў пробашч гродзенскай парафіі Святога Духа кс. канонік Павел Салабуда. Другая частка свята праходзіла на прыкасцёльнай тэрыторыі. Арганізатары падрыхтавалі шмат забаваў як для дзяцей, так і для дарослых. Дзейнічалі інтэрактыўныя, дзіцячыя пляцоўкі і пляцоўкі з хатнімі жывёламі, праходзілі майстар-класы і іншае. У падрыхтоўцы свята актыўна ўдзельнічалі парафіяне, яны ўносілі свае прапановы і гатавалі пасілак.

Па словах удзельнікаў, гэты дзень стаў сапраўдным святам сям'і, аб'яднаў людзей розных пакаленняў.

Прэс-служба Гродзенскай дыяцэзіі

Фота: Віталій Шмурай