25 мая, у свята Найсвяцейшай Панны Марыі, Маці Касцёла, біскуп эмерыт Аляксандр Кашкевіч удзяліў сакрамэнт канфірмацыі вернікам парафіі благаслаўлёнай Мар’яны Бярнацкай у Гродне (Сапоцкінскі дэканат).
Канфірмацыя адбылася на святой Імшы, якую першы ардынарый дыяцэзіі цэлебраваў у часовай капліцы, побач з якой будуецца касцёл гэтай маладой парафіі. Прысутнічалі шматлікія парафіяне і госці, у тым ліку духавенства на чале з дэканам Сапоцкінскага дэканату кс. Уладзімірам Аксенцьевым. Сакрамэнт прынялі 22 чалавекі, атрымаўшы такім чынам, паводле вучэння Касцёла, дары Духа Святога і абавязаўшыся быць сведкамі Уваскрослага Езуса Хрыста.
Пробашч кс. канонік Юрый Марціновіч прывітаў прысутных і падкрэсліў, што гэты дзень, калі група маладых парафіян, прыступаючы да канфірмацыі, абавязваецца мужна вызнаваць сваю веру і жыць згодна з ёю, вельмі важны для парафіяльнай супольнасці.
У гаміліі біскуп звярнуў увагу на тое, што кожны ахрышчаны павінен удзельнічаць у ажыўленні Касцёла і што чалавек, напоўнены дарамі Духа Святога, можа адказваць на ўсе выклікі, якія перад ім ставіць свет.
Канфірмаваным іерарх пажадаў, каб Дух Святы ўчыніў кожнага з іх “мацнейшым у веры, больш адкрытым на праўду і дабро, здольным супраціўляцца злу і фальшы, якія, на жаль, заўсёды атакуюць вучняў Хрыста”. Таксама ён заахвоціў іх быць блізкімі да Езуса, ісці шляхам Евангелля, Божых загадаў, любові і прабачэння, служэння Богу і бліжняму.
“З дапамогай Духа Святога адважна ідзіце за Уваскрослым Хрыстом, нашым Панам і Збаўцам, дазвольце Суцяшыцелю весці вас, каб прыняць Божае слова і даваць аб ім сведчанне сваім жыццём”, – сказаў біскуп.
У канцы Імшы канфірмаваныя выказалі ўдзячнасць іерарху, свайму душпастыру, катэхетам і ўсім, хто прычыніўся да падрыхтоўкі гэтай падзеі.
Біскуп удзяліў выпускнікам навучальных устаноў благаслаўленне на новы этап жыцця. Ён папрасіў маладых людзей аберагаць тыя каштоўнасці, якія яны атрымалі праз выхаванне сваіх бацькоў і настаўнікаў.
Таксама біскуп пажадаў маладым парафіянам быць адкрытымі на натхненні Духа Святога, паколькі Ён заўсёды дапамагае зрабіць правільны жыццёвы выбар.
Прэс-служба Гродзенскай дыяцэзіі
Фота: Артур Антушэвіч
