Біскуп Гродзенскі Уладзімір Гуляй віншуе каталіцкае “Радыё Марыя” ў Беларусі з дзесяцігоддзем з пачатку вяшчання, якое яно адзначае 31 кастрычніка.
Біскуп звярнуўся да кіраўніцтва радыё, супрацоўнікаў, валанцёраў, слухачоў і ўсіх, хто спрыяе служэнню радыё малітвай і падтрымкай, з прывітальным словам:
Сардэчна вітаю вас і з вялікай радасцю віншую з прыгожым юбілеем – дзесяццю гадамі ў эфіры. Гэта важная дата для ўсіх, хто на працягу гэтых гадоў працаваў, маліўся і служыў дзеля таго, каб голас “Радыё Марыя” даходзіў да людскіх сэрцаў.
Радыё суправаджае чалавека ў самыя звычайныя хвіліны дня: у дарозе, дома, на працы, у час адпачынку і цішыні. Праз яго да людзей прыходзяць Божае слова, малітва, разважанне і сведчанне веры. Для кагосьці перадача становіцца нагодай глыбей задумацца, для кагосьці – крыніцай суцяшэння, а для самотнага чалавека – знакам, што ён не забыты і не адзін.
У гэтым бачу асаблівую каштоўнасць вашага служэння: вы дапамагаеце людзям адкрываць сэрцы для прысутнасці Бога ў іх жыцці.
За кожнай перадачай стаіць вялікая праца і вернасць многіх людзей.
Выказваю шчырую ўдзячнасць кіраўніцтву і супрацоўнікам радыё, вядучым і гасцям праграм, валанцёрам, святарам і кансэкраваным асобам, а таксама ўсім слухачам і дабрадзеям.
Дзякую за ваш час, таленты, ахвярнасць і малітоўную падтрымку. Няхай Пан аддзячыць кожнаму за дабро, якое вы чыніце.
Імя Марыі, якое носіць радыё, нагадвае нам пра жанчыну, якая з верай прыняла Божае Слова і з радасцю панесла Хрыста іншым.
Няхай Найсвяцейшая Панна будзе для вас прыкладам уважлівага слухання, даверу Богу і гатоўнасці служыць. Няхай Евангелле застаецца сэрцам вашай працы, а кожнае слова, якое гучыць у эфіры, нясе праўду, надзею і спакой.
Жадаю вам, каб наступныя гады былі напоўненыя Божым благаслаўленнем, творчым натхненнем і еднасцю.
Няхай у вашым служэнні заўсёды знаходзіцца месца для голасу тых, хто шукае, сумняваецца, перажывае цяжкасці і прагне сустрэчы з Богам.
Няхай “Радыё Марыя” і далей дапамагае людзям пазнаваць Хрыста, маліцца разам і будаваць адносіны, у якіх ёсць месца для праўды, міласэрнасці і любові.
Дзякую вам за гэтыя дзесяць гадоў вернага служэння. Віншую з юбілеем і ад усяго сэрца жадаю, каб “Радыё Марыя” ў Беларусі працягвала быць добрым голасам Евангелля і надзеі для многіх людзей.
Няхай Пан благаславіць вас, вашыя сем’і і ўсю вашу працу. Няхай апека Марыі суправаджае вас сёння і ва ўсе дні.
Біскуп Гродзенскі Уладзімір Гуляй
Гродна, 30 кастрычніка 2026 года
