2-3 кастрычніка ў рэкалекцыйным Доме міласэрнасці дабрачыннага каталіцкага таварыства “Caritas” Гродзенскай дыяцэзіі ў Сапоцкіне прайшла сустрэча валанцёраў таварыства.
Багатая праграма сустрэчы дазваляла аб’яднаць удзельнікаў рознага ўзросту, спалучала душпастырства, малітву і творчасць. Галоўным пунктам праграмы былі Імша і малітва, мэтай якіх было дапамагчы валанцёрам духоўна аднавіцца і падзякаваць Богу за магчымасць служыць бліжнім.
Адметнае месца ў праграме заняло выступленне сакратара біскупа Гродзенскага кс. Анджэя Ганчара, які падзяліўся вопытам місіянерскага служэння ў Афрыцы. Удзельнікі называюць гэты момант сустрэчы надзвычай кранальным, кажучы: “Аповеды ксяндза Анджэя пра жыццё, веру і выпрабаванні на афрыканскім кантыненце глыбока кранулі сэрцы прысутных, сталі жывым прыкладам самаадданасці і супольнасці ў Хрысце”.
Сустрэча мела таксама творчую частку: як для дарослых, так і для дзяцей былі арганізаваны майстар-класы, якія ўдзельнікі называюць захапляльнымі. “Прастора напоўнілася цёплымі размовамі, шчырымі ўсмешкамі і атмасферай даверу”, – кажуць яны.
Удзельнікі адзначаюць вялікую карысць такіх сустрэч, якія, па іх словах, не толькі ўмацоўваюць дух каманды “Caritas” і згуртоўваюць яе, але і натхняюць на далейшае служэнне, каб разам несці Хрыстовае святло і надзею тым, каму гэта найбольш патрабуецца.
Прэс-служба Гродзенскай дыяцэзіі
